Paldelkupa gla romska

An marsio masek nast diro savo privatikadseno ire dova organiphan diro parela nominiriba kandidati to dova paldelkupa savo nashta kereles gla chibcentri gla romska.

Isof nast kerel jeck paldelkupa gla saste ta jikk attjer dolle de nacionalipha chibcentrir. Paldelkupans rolja ovelar te parda Isofs meng ninna te keribe oppre bukjakerepes ta dela vorsnus dumo ta godi an kava menget, sichsava an kava prastande menget ninna bukjakeripen.

Akana nast diro ire dova organiphan diro parela nominiriba kandidati to paldelkupan. Pre dova akate patrin parmissar vorsnos sar dole jarr to ta so paldelkupan clabiddras kerra. Diro nominiribar jeckk dseno preal te perda an formulari akate pre patrin.

Lesjtsta divus gla nominiriba: Dova 31 marsio 2022.

Puscha dsenon anglad

Kava honkar barot te diro savo nominiribar jeck dseno anglad puscha dsenon bási lio ojadejber to nominiriba, an ta ninna te diro avar te biha andri dsenons kontaktijanepha. Akate nast diro drabba bási sar vorsnos dikhjaripa dsenojanepha.

So nast paldelkupan kerra?

Paldelkupans rolja glan chibcentris kerelande blirovelar te parda Isofs meng ninna te keribe oppre bukjakerepes ta dela vorsnos dumo ta godi an kava menget. Karna chibcentrin sukar kammat etablirinelot ketanebeskedipa paldelkupa ninna Isofs ninnamengare komaj star volta ko basjt. Dólle trissen rekks butvars digitaltali, abber dumor nast sasstroa. Paldekupan kammar párdade janephar:

• dela Isof dumo ta godi anangla asjadent attjer nacionalipha chibcentri telall 2022
• dela Isof dumo ta godi ashter asjadent an menget pre chibcentri.
• hilpre to te dela anglonise chijber anangla svocko bukjakerpesbasjt, avrifann savo respektivi chib kammar.
• hasting ninna chibalo ta kulturaliph kompetencija
• hasting ninna reselen keribe gla te lattja tergjolag baramengar ninna civilikano sarinipet representiript, interesi organiphar ta vavra
• basjtano avar ninna sajarodi pre glasukaredar ta angledsajpe attjer chibcentris bukjakerpes.

Nast padelkupan trissas biso lelakotar attjer Isof?

Ehe. Anangla svacko trissa ninna chibcentris bukjakerpes ingariphar debes saipet to jikk glatrissa odori vajt dzenor an padelkupan jures.

Ovelar padelkupan honorariet?

Ja. Padelkupans dzenor ler honorari gla dolle trissen dolle de kallas to káras, ama tji gla glatrissen. Isof prejser trádar ta bóddrande an dolle ovipe trádror to trissen sasstror.

Sar harga beschar manus savo delegato an padelkupan?

Genj delegaton avar te ovel pansh to efta desenor. Jeck deligato ovelar tobescha pre trin basjt ta agorlejphet nast barakarelas panda jeck madatimoment. Sastsav maksimalikano sinkus basjt.

Konn pottor savia savo nashta bescha an padelkupan ashter nominiriben?

Isofs generalidirektori agorbal bási konn savo beschar an padelkupan, ashter te nominiriben tjiron kammar agorkepen ta nominiribens telipen kammar kuckerelats. Padelkupan saste kamma jeck jeko ulavelas najek basjtsipe, bij ta themkota spreddra. Delegaton saste kamma najek kompetencijar, savsavo najek dialektir attjer romska, pedagogika, kommunikacija, revitaliserings phirnipe ta búvlott kontaktinukta.

Konn nast miro nominiriba?

Diro nast nominiriba dsenor savo diro potter nast toanglal dsanip to menget ninna chibcentri. Kava honkar saj te prijav intreresi preal te nominiriba siro solis.
Nicen bukakeda niga Isof nast tji niminiribas. Bási jeck dseno savo ovelat ansimad an padelkupan rodelar ta ovela glasorolos jeck bukakening niga Chibcentri/Isof nast dova tji längre bescha pale savo delegato an i padelkupan.

Sar kerr miro karna miro nominiribar ta sar butt nast miro nominiriba?

Ismarel webb formulari pre dova akate patrin ta perd an dova informacija savo Isof hóftarer gla to nasta simaja dzenor to padelkupan. Diro nast nominiripe buttar dsenor, abbo denka pre te vorsnos mangela kamma jeck jeko ulavelas attjer najek basjtsipe, bij ta themkota spreddra.