Bási bastalon

Instituphat gla rotepa ta manishatusen (Isof) honkar jeck themjarlo bastalo an Svedijo. Vorsnos keriber oppre, khedeler andri ta spreddre dsanip bási Svedijos rotepa ta kultúra.

Dzanribastalo

Vorsnos honkar dzanrir pre kava svedoa rotepat ta dialektir, dolle nacionalipha haripansrotepan lallaroska, jiddisch, meänkieli ta romska hem svedijot nisanirotepa. Vosnos dzanris baripar aur thannav, desenonav, kultúra ta puranokeriphar an Svedijo. Vorsnos asjas to gla sass rastrape ta honkar jeck tovolta gla buttar sanatinkubar, khedipar ta oganiphar. Vorsnos bistår phuvjakirin ninna teliphe ta rekomandiriber ta delar dumo to vavra bastalor.

Vornos rodror ta keriber oppre dsanip

Vorsnos rodror, rodkerelar ta vakerepar vosnus andre voror dzanrithanen. Vorsnos keriber oppre nevoa dsanipthanen ta vasdepher barot sarinipespuchar avrifann vosnos dzanridsanip ta dolle rodepolitikas ta kultúrapolitikas resinen.

Vorsnos arakhlor ta khedeler andri dsanip

Vorsnos arakhlor rodepan, nav ismerelat ta kava tovolta kultúramangin. Vorsnos pardar aur sarinipangledsajbe tjujal rodepa ta kultúra ta khedeler andri paramissir ta dsanip bási vosnos tjiro. Voroa badalikapa ta digitali arhipa honkar jeck jidrande hatusbanka savo honkar to gla sass.

Vorsnos delar godi ta spreddre dsanip

Vorsnos delar godi ta rekomandiriber ta svaderar pre pucher fann sarinipen, kikid ta sanatibukjakeripe. Vorsnos dumodela to jikk lattjot drabbande ta delar sass saipet te le kota attjer ta karela Svedijos rodepa ta kultúra.

Opprecitni fann phuvjakirin

Kava honkar dova svedoa phuvjakirin savo agorbal bási pakjalapa Isofs bukjakeripe. Fann phuvjakirin kammar vorsnos svacko basjt jikk haberipa savo maskar vavoret soisipher resin ta resultatitrodipe hem bastalons hasting. Orsnos kammari aur jeck buttar durihutno agorlejphe savo pottor so vorsnos nashta megra ninna.

Bukjakeripe pre Búttar thanar

Vorsnos kammar komaj 90 bukakeda ta kammar kotoriphar an Göteborg, Stockholm ta Uppsala. Bastalons ingaripe ta administricija asjas an Uppsala.