Diros horte to nacionalipha haripasrodepa

Sass bastalor an Svedijo kammar ushlalipe te informacia sass nacionalipha haripar bási dovas rotesickloa caciper, thaj jiddisch- ta romskrakkrande.

Preal dova akata tekstin ler diro jana savia rotesickloa caciper diro kammar ta savia rodipe diro nast hag pre diros kommúna ta pre vavra bastalor.

Savo nacionalipha haripar jinnepàs býskror, romer, pajkor, svedija lallarór ta tornedalingar. Dolle nacionalipha haripasrodepan honkar är lallarórske, jiddisch, meänkieli, romani chib ta pajkoske.

Dova 1 januario 2010 avar jeck konu bási nacionalipha haripar ta haripasrodepa (SFS 2009:724 External link., webbpatrin pre svedoa) ta an januario 2019 javarars konun sav te caciper ta ushlalipár sordalos pali. Sass komúnar honkar ushla te lela resin ta rigariper gla siros haripas pólitikas megra. Komúnan nasht aur rescha jeck misaparde djalogo ninna diro savo parel jeck nacionaliph haripat gla te dokka diro pheribe an puchar ta agorbe savo dolela diro avrifann jikk haripats dikkahel.

Sass nacionalipha haripasrodepa nasht arakdelas ta kerelas

Rotepakanun (SFS 2009:600 External link., webbpatrin pre svedoa) puckar te dolle nacionalipha haripasrodepa nasht arakdelas ta kerelas. Kava andrikar to misalar te sarinipet nasht jura to te diro savo parel jeck nacionalph haripat ler dsanipa diro, angledsaj ta ismarela diros haripasrodepa.

Bastalorna nasht informacia diro bási diros caciper, oginda savit nacionalipht haripasrodepa diro rakkra ta sako diro boddra an Svedijo.

Horte to dagriaresin sikavibe

Gla diro savo parel nantis attjer dolle nacionalipha hariparna ta kammar nucko an drabbahispan nast kava asha tjibbig te jana te diros nucko kammar ulavelat sorralo horte to dagriaresin sikavibe. Diros nucko kammar horte te le dagriaresin sikavibe an siro haripasrodepa thaj bási rodepat tji rakkras kheren to sakodivus. Diros nucko hòftarer tji kamma hari dsanipar an rotepat fann agran gla te le dagriaresin sikavibe.

Drabbrahispan honkar ushla te kornisa dagriaresin sikavibe an dolle nacionalipha haripatrodepa bási

• Jeck sikljovno mangela le sikavibe (kava asjas sassko nani rodipe pre te kava nasht asha kuttist pansh sikljovnor)
• kava asjas jeck tergjolag drabbrano.

Kava honkar rektori savo agorbe bási jeck drabbrano honkar tergjolag te sikavibe an dagriaresin.

Bási diros nucko parel dova nacionalipha haripan romer ta kammar ninna siros jikk vavoret rodepa fann avriske-themm ler drabbrahispan dela dagriaresin sikkavibe an dy rotepa bási kava asjas ulavela soskipe.

Ulavelat sorraloa caciper gla lallarórske, meänkieli ta pajkoske

Ulavelat sorraloa caciper kammar diro savo rakkra, meänkieli ire pajkoske ta boddra an jeck komuna andre jikk administririphes than. Pre patrin Förvaltningsområden (webbpatrin pre svedoa) nast diro jura bási diros komúna khuvelar an jikk administririphes than.

Diro savo boddra an jeck komúna andre jikk administririphes than kammar horte te komúnikacija ninna bastalorna pre diros rotepa. Diro nasht nasta le mojali svadera pre savriga rotepa bási diro honkar shild an jikk pasibe savo kammar phamibe to administririphes than.

Komúnarna nasht ponom drabbakanun marepa ashter te nisa angladrabbehisp kori bukjakeripen honkar sarot ire to baro kota pre haripasrodepan lallaróske, meänkieli ire pajkoske, bási kava asjas dad ta dagria savo rodela kava.

Komúnarna nasht aur glasorolo puronoarakhibe pre lallaróske, meänkieli ta pajkoske.

Diro savo boddra an jeck komúna savo tji khuvelar an jikk administririphes than nasht aur nasta kontaktipha bastalorna pre lallaróske, meänkieli ire pajkoske, bási kava asjas dseniphe ninna dsanipar an rotepat.

Diro nasht nasta le tenabut jeck kota attjer básiarakhiphen andre puronoarakhiben pre lallaróske, jiddisch, meänkieli, romani chib ire pajkoske, bási komúnan kammar tovolta to dseniphe ninna savoa rotepadsanipa.

Komúnar ta bastalor honkar ushla te informacia diro savo parel jeck nacionaliph haripat bási diros caciper. Dolle honkar aur ushla te arakdela nacionalipha haripars rotepa ta kultúra, ta ulavelat barot honkar nuckors ta ternos horte te le angledsaj siros rotepa ta siros kultúra. Dovasávri honkar komúnar ta vavra bastalor ushla te dokka diro inflytande preal puchar savo dolela dova nacionalipha haripat diro parel.

Oginda sako diro boddra nasht diro sàrstil nasta randra pre lallaróske, meänkieli ta pajkoske to Themmdivusens representanti, Drustsekretari, Fakkamáskarkeriphen, Siguripekhéren, Deisibebukja ta Diskriminripens representatismuschen.

Kaj nast diro tjujalin diron

Bási diro tji dynkrar te diros komúna ire vavra bastalor jiddra uppre lever to kanun nast diro kontakti Themmingariben an Stockholms provincija ire Pajkotjattjopa savo nasht jura to te kanun pards. Pajkotjattjopa dóchlarr gla pajkoske ta themmingariben an Stockholm dóchlar gla javera rotepa.

Länsstyrelsen i Stockholms län External link.
Taven: 010-223 10 00

Sametinget External link.
Taven: 0980-780 30

Akata nast diro drabba búttare

Akate asjas ketter to vavra webbthanar kori diro ler jana buttar bási diros caciper ta bási administoririphes than. Solsibet pre webbthanarne honkar pre svedoa.

• Webbplats för de nationella minoriteterna External link. (minoritet.se)
• Stöd i undervisning om nationella minoriteter External link. (Skolverket)
• Om nationella minoritetsspråk (isof.se)
• Lagen om nationella minoriteter och minoritetsspråk External link. (Regeringen)
• Rätten att utveckla sitt nationella minoritetsspråk External link. (Skolverket)
• Nationella minoriteter och minoritetsspråk External link. (Länsstyrelsen i Stockholms län)