Nevipe lill 3 chibcentri
Telall 2022 nashta Isof etablinela nacionalipha chibcentri gla haripatschiben gla lallarróska, byskrorisk, meänkieli to romani ta akate an nevipe lillet nast diro drabba bási mengets glansiggrepat. Telall aprilio ta majio kammar rigar pre te tobescha padelkubar ta regrutipe búttar nevoa ninnamengare to voroa chibcentri.
Phirnit ninna padelkubar to chibcentri
Akana honkar tobatiben attjer delegator to chibcentrins padelkubar phirni. Padelkubarna nashta tjivinar savo dsanrikupar ninna janepha te dromnice ta dumodela chibcentri an dovas meng. Padelkuban gla byskrorisk kammar isi siros oppreavgojbe trissa ta telall majio masek avar thaj dolle vavra padelkubar te kamma siros angleske trissan.
Svacko padelkuba tergjoler attjer komaj pansh to sinkus deligator savo reprezentiripha chibikerela. Dolle chivelas telall jeck moment attjer trin basjt ninna saipet to barakriphe ninna maksimalikano jeck mandatimoment. Angla padelkubarnar kammar deligatornas kompetencija ta janephar diskusijar an jekgodi ninna nacionalipha haripar. An simalit kammar vorsnos lelat respekti to najek kompetencijar savo phernipe attjer durustiphe, petagogika ta chibvipepalipa ta to dolle nominiribes phamibe to univerziteti savo dochlar gla chiben hem hàsjtat andri tjibbig prele bijen ta jeck geografijas spreddra.
Pre voroa webbpatrin nast diro drabba búttar bási padelkubarnas janephar ta savia deligatorna honkar:
Vorsnos odoredar rekrutiphen attjer nevoa ninnamengare
Vorsnos odoredar te intervjua kandidatir to dinreskerna savo Bukjakeripeingararipa ta Chib barakerari to chibcentrin. Korodibning tjiron gla dole dingster kammar jad vri ninna telopa gla dingsten savo chib barakerari an meänkieli ninna chipharig an Kiruna savo panda honkar oppre to ta ninna 20 majio. Dovasávri regrutipher vorsnos jeck kotasefi gla nacionalipha chibcentri ta jeck kotasefi gla chibarak nacionalipha haripar ta svedo nisanichib savo nashta menga pre dova nevoa kotoriphen ninna rigaripha koro nacionalipha haripars chib ta kultura.
Isof gostiade Kiruna
Dova 4–5 majio gostiade Isof Kiruna gla te avgojba jikk baromenga ninna Kiruna komúna ta Pajkobukjat bási chibcentri ta gla jura pre thannar gla dova filijala attjer chibcentri meänkieli savo nashta pacha an Kiruna. An djalogo ninna Pajkobukjat preagrade vorsnos planerimenget ninna te le glann nisani gla te nasta parda nacionalipha haripatschibens angledsajpe.
Diros dikkahipe honkar baroa
Vorsnos oppredeisiber kava baroa bukarela ta intreresi savo asjas angla asjadent attjer nacionalipha chibcentri ta kammar preal jekgodi ta baromengan ledd ninna vosnus baroa gindar ta idejar to kava odore planerimenget. Avela nevipe lill aver te publicirinelas an junio.
Pre voroa chibcentri webb isof.se/sprakcentrum
External link. nast diro drabba bási mengets glansiggrepat ta diro kammar puchar ta dikkahipe bási vorot meng ninna asjadent attjer chibcentri ler diro lockho kontaktipha vorsnus kotar e-mail adresan sprakcentrum@isof.se!
/Ann Heimer,
projekttingariphar gla chibcentrimenget pre Isof