Åjváladtja birra

Giella- ja älbmukmujjtoinstituhtta (Isof) lä stáhtalatj åjválatj Sverjin. Mija dahkap, tjuhkkip ja juohkep diedov Sverji gielaj ja kultuvraj birra.

Dåbbdejåjválatj

Mija läp dåbbdeja dárogiela ja dialiektaj, rijkalatj unneplågogielaj såmágiella, jiddisch, meänkieli ja romágiella ja dáro tjuvvdegiela birra. Mija tjiehpesvuohta gåpptjá aj bájjkenamajt, almatjnamajt, kultuvrav ja dijdajt Sverjin. Mija gävdnup gájk viesádijda ja läp vähkke mådde virrgejuhkusijda, sebrijda ja organisasjuvnajda. Mija viehkedip rärridusav vuoroj ja rärij ja dårjodip ietjá åjváladtjajt.

Mija guoradallap ja dahkap diedojt

Mija guoradallap, tjielgadip ja mållget mija dåbbdejdáfo sinne. Mija dahkap årrå diehtodáfojt ja luggŋip ájnas sebrudakgatjalvasajt mija dåbbdejdiedost ja giellapolitijkalatj ja kultuvvrapolitijkalatj ulmijst.

Mija sujttip ja tjuhkkip diedojt

Mija sujjtip gielajt, nammaadnemav ja vuojŋalatj kultuvvraárbev. Mija aj tjuovvop sebrudakåvvdånimev giela ja kultuvra birra ja tjuhkkip subbtsasijt ja diedojt mija ájge birra. Mija fysalatj ja digitála arkijva lä viessoj mujjtovuarrká gájk divnajda.

Mija vaddep rärijt ja juohkep diedojt

Mija vaddep rärijt ja rekommendasjuvnajt ja svärrup gatjavalsajt älbmugist, priessast ja virrgealmatjijst. Mija barrgap dan åvdåst ahte lierram sjaddá suohtas ja vaddep gájkajda máhttelisvuodav åsev válldet ja furbmit Sverji gielajt ja kultuvrajt.

Dahkamus rärridusast

Sverji rärridus mierreda vijjurijt Isof:a dåjmå åvdåst. Rärridusast ådtjop fiert jáben njuolgadimbrievav man sinne lä åvvdåmärrkan ulme ja tjuovosruodtjolvasa ja åjváladtja bedniga. Mija aj adnep ienap guhkesájjgásatj biejadasav mij mierreda mav mija gallgap barrgat.

Dåjbmå ienap sijijn

Mija adnep 90 barrgeja bájken ja ussudaga Göteborgan, Stockhålmån ja Uppsalan. Åjváladtja stivvra ja administrasjuvdna gävdnu Uppsalan.