Nevipe lill 4 chibcentri

Telall 2022 kammar Isof an etablinela nacionalipha chibcentri gla haripatschiben gla lalarróska, byskrorisk, meänkieli ta romani. Angla vavra fazen savo kammar rigas pre djalogor, te tobecha padelkupar, rekrutipar attjer ninnamengare ta lattja thannar gla chibcentri jar koro siros phat. Fann ta ninna buition 2022 preagradas oppre avgojben attjer nacionalipha chibcentri ninna dolle nevoa ninnamengare ta sefirena pre than.

Baroa dikkahiper an djalogotrissen

Angla etablinelan attjer nacionalipha chibcentri kammar kava besjat baroa gla Isof te glan jeck dialogo, ninna najek dikkhelarir gla te diskusija ta khedel andri dikkahiper. Vorsnos kammar prealanglot phravda jekgodi gla dolle savo rakkra ire Ikerel pre dolle nacionalipha haripatschiben lalarróska, byskrorisk, meänkieli ire romani, gla haripats organiphar, gla univerziteti ninna opprecitni te menga ninna dolle nacionalipha haripatschiben ta gla haripats kotanisare an komúnar. Vorsnos kammar an sass dole dialogor ledd ninna vorsnus baroa gindar ta idejar bási chibcentri bukjakeripe ta bási etablinelan attjer chibcentri.

Padelkubar

Isof kammar teláll nevoniljan tobeschat jeck padelkuba gla svacko chibcentri. Padelkubarna tjivinar savo dsanrikupar ta kammar jeck baroa rolja ninna jjanepha te dromnice ta dumodela chibcentri an dovas meng. Svacko padelkuba tergjoler attjer komaj pansh to sinkus delegator savo reprezentiripha chibikerelar. Sass padelkubar kammar isi jikk angleske trissa ta avar te odore parda ta dumoja etablinelan attjer chibcentri.

Pre vosnos webbpatrin nast diro drabba búttare bási padelkubarnas janephar ta savia delegatonerna honkar:

https://www.isof.se/vart-uppdrag/isofs-regeringsuppdrag/sprakcentrum-for-nationella-minoritetssprak/nationella-sprakcentrum/nyhetsbrev-sprakcentrum/nyheter-sprakcentrum/2022-04-29-klart-med-styrgrupper-till-sprakcentrum External link.

Nevoa ninnamengare to chibcentri

Dseniphen gla oppre avgojben attjer nacionalipha chibcentri an jikk angleske bekk honkar phirni. Dolle nevoa ninnamengare avar te preagra siros bukakeningar ashter tattotinen. Akate honkar dolle phirnia rekrutipherna:

• Chibcentri lallaróska – dy chibbarakerari honkar phirnia, rekrutiphe attjer bukjakeripeingararipa prejar.
• Chibcentri meänkieli an Övertorneå − jeck bukjakeripeingararip ta jeck chibbarakerari honkar phirnia.
• Chibcentri meänkieli an Kiruna − jeck chibbarakerari.
• Chibcentri romani − jeck bukjakeripeingararipa ta dy chibbarakerari.
• Chibcentri jiddisch − dy chibbarakerari honkar phirnia. Dinresken savo bukjakeripeingararipa sikripes vri pali ashter tattotinen.

Vorsnos sastekeripha voroa nevoa kolega sukaravada to Isof!

Nevo jeckhini gla chibcentri pre Isof

Voroa star chibcentri avar kettanes chiphas pre jeck jeckhini telall jeck nevosiclo Kotoriphe pre Isof ninna dochal gla nacionalipha haripans chib ta kultúra. Dinresken savo kotasefi avar te tobechas telall gla tattotinen.

To dinresken savo kontoriphesefi toanlelar Harriet Kowalski dova 1 julio, li honkar gla otheviphen kontoriphesefi niga Chibgodit. Karna Harriet toanlelar siros dinrest lelar li preal dochalot gla avela faza an chibcentri menget – oppreavgojben fazen savo nast prejar to ta ninna oktobero. Avoashter avar dova nevoa kotasefin gla chibcentri te dochalot gla prealanglande.

Thaner ta thanaloa baromengan

Telall etablinelas fazen kammar Isof lelat bútti kontaktiphar gla te diskusija baromengan tjujal thaner ta barasavriga puschar. Vorsnos kammar maskar vavoret gostit Övertorneå ta Kiruna. Akana honkar kava phirnit ninna thaner gla svaco chibcentri:

• Chibcentri lallarróska aver te ulavela thaner ninna instituphat gla chib ta manushatusen an Uppsala.
• Chibcentri meänkieli an Övertorneå aver ulavela thaner ninna Nordkalottens kultúra – ta rodkeribascentri odori ire saiperlibrikheret gla meänkieli asjas chiphat.
• Chibcentri meänkieli an Kiruna avar te kamma siros baza pre Malmfältens manisjusidrabbahispa.
• Chibcentri romani aver te chiphas pre instituphat gla chib ta manushatusen (Chibgodit) an Stockholm.
• Chibcentri byskrorisk i Stockholm aver te chiphas pre instituphat gla chib ta manushatusen (Chibgodit) an Stockholm.

Diros dikkahiper honkar baroa

Viorsnos oppredeisiber kava baroa bukarela ta intreresi savo asjas angla asjaden attjer nacionalipha chibcentri. Pre vosnos chibcentri webb isof.se/sprakcentrum External link. nast diro drabba bási ananglade meng ta bási diro kammar pucher ta dikkahiper ler diro lockho kontakti vorsnus kotar e-mail adresan sprakcentrum@isof.se!

/Ann Heimer,
projektingariphar gla chibcentrimenget pre Isof