Meänkielen päivä

Hyvvää meänkielen päivää! 27 fepryaaria fiirathaan meänkielen päivää.

Meänkielen päivää fiirathaan sen muistoksi ko meänkieliset kokkoonnuit Pajalassa fepryaarissa 1988 ja julistit meänkielen omaksi kieleksi. Tapahtummaa markkeerathiin SVT:n Café Luleåssa jonka prukramminvetäjä Lasse Eriksson puhutteli Östen Grothia ja Bengt Pohjasta styytiossa.

Klipissä saat nähä esimerkiksi kunka Henning Johansson julistaa hänen puhheessa ette meänkieli oon nyt kieli muitten joukossa – “vårt språk är nu ett språk bland alla andra”. Klikkaa kuvvaa niin pääset suohraan Youtube-filhmiin. Kuva: Särmiklippi SVT:n Café Luleåsta, 1988.

Vuona 2007 perustettu Meänmaa-föreninki alko fiiraahmaan meänkielen päivää ja päivän markkeeraaminen oon pikku hiljaa kasunu joka vuosi. Nykyhään meänkielen päivän tapahtumia järjestethään eri puolila maata. Jos haluat lukea lissää tärkeistä meänkielen tapahtumista fepryaarissa 1988 niin Bengt Pohjasen kirjassa "Byta språk, byta mask" kerrothaan niistä.

Kansalinen minuriteettikieli

Vuona 2000 meänkieli ja neljä muuta kieltä sait kansalisen minuriteettikielen staattyksen Ruottissa. Net viis kieltä ovva jiddisch, meänkieli, roomi, saame ja suomi. Ruottin hallitus otti vastuun ette suojela ja eistää näitä kieliä, ja kielenkantajat sait staattyksen myötä vahvemat oikeuet. Meänkielen hallintoaluekunnitten asukhaila oon erityiset oikeuet, esimerkiksi oikeus komyniseerata viranomhaisten kansa meänkielelä ja saaha föörskuula ja vanhuusten hoito kokohnaan eli osittain meänkieleksi.