Nevipe lill 5 chibcentri

Telall 2022 kammar Isof an opprecitni te etablinela nacionalipha chibcentri gla dolle nacionalipha haripatschiben lalarróska, byskrorisk, meänkieli ta romani. Fann ta ninna septembero masek honkar bútt ninnamengare pre than ta vorsnos menger ninna te keribe jeck barasavrig phuv gla dolle starto nacionalipha chibcentrinen. Telan buition avar vorsnos dovasávri te dela anglonise te sjunna andri ta kota attjer glabiddrar pre chibcentri savo dolle nacionalipha hariparna kammar.

Barasavriga avgojbedivusar

Vorsnos honkar andri an jikk ovibede ninna ta keribe jeck barasavrig kompetencija phuv gla opprecitnet. Dole oviber preal internati kompetencija angledsajpe ta sikljojbe. An sikljojbne khuvelar jikk genj glancidibe savo glaphimia chibvipepalipa.

Telall septembero kammar maskar vavoret Lennart Rhodin drabbrat bási dova nacionalipha hariparnas politikans angledsajpe. Leena Huss bási chibvipepalipa ta selare pherniper, Kaisa Syrjänen Schaal bási drommen glann to agorbet bási nacionalipha chibcentri ta Jarmo Lainio bási Evropigodit kontrolaripher attjer dova svedoa haripaspòlitikan. Isof:s nevoa palikerel dsanri Sari Pesonen kammar drabbrat bási faktorir sovo prekerepar jikk chibs jibbsoralipe ta dova chibpolitikas rodkerelaren, Jennie Spetz kammar drabbrat bási Isof:s najek opprecitni angla te chibcentri agorbades bási.

Padelkubastrissen

To svacko chibcentri asjas kava jeck padelkuba kaskoro janepha honkar te dromnice ta dumodela sass chibcentri an dovas meng. Sass padelkubar kammar jikk angleske trissa telall amoron ta jikk trissa an augustio ta avar te odoredare tjill butiket an angledsajpen attjer chibcentri.

Nevo sefi gla chibcentri

Dolle star chibcentrinen honkar chiphade pre dova nevoa kotoriphen gla nacionalipha haripatstas chiben ta svedijot nisanichib. Pre kotoriphen, savo nics attjer Harriet Kowalski, asjas dy kotoriper: kotoripen gla arakchib ta kotoripen gla chibcentri. Telall tattotinen kammar Anna Gezelius tokinnat savo kotasefi gla kotorip en gla arakchib ta Elina Majakari kammar ledd opprecitnet savo kotasefi gla chibcentri ta avar te haripoharit asha pre than telall buiten.

Akate asjas nacionalipha chibcentri

Thanrengen attjer dolle nacionalipha chibcentrin hem thannar gla svacko chibcentri kammar avat làngstrot.

Akate nast diro épa respektivi chibcentri ta dovas ninnamengare:

• Chibcentri lalarróska an Uppsala
  sprakcentrumfinska@isof.se

• Chibcentri meänkieli an Övertorneå
• Språkcentrum meänkieli i Kiruna
  sprakcentrummeankieli@isof.se

• Chibcentri romani an Stockholm
  sprakcentrumromska@isof.se

• Chibcentri byskrorisk an Stockholm
  sprakcentrumjiddisch@isof.se
  

Odor djalogo bási chibcentri

Angla etablinelan attjer nacionalipha chibcentri kammar kava besjat barot gla Isof te rescha jeck djalogo ninna najek dikkhelarir gla te diskusija ta khedel andri dikkahiper. Vorsnos kammar an sass dola djalogor ledd ninna vorsnus barot gindar ta iIdejar bási chibcentris bukjakeripe ta bási etablinelan attjer chibcentri. Telall buiten odoreder vorsnos te sjunna andri ta le kota attjer glabiddrar pre chibcentri savo dolle nacionalipha hariparna kammar.

Diros dikkahiper honkar baroa

Vorsnos oppredeisiber kava baroa bukarela ta intreresi savo asjas angla asjadent attjer nacionalipha chibcentri ta dovas ovelande bukjakeripe. Pre vosnos chibcentri webb isof.se/sprakcentrum External link. nast diro drabba bási menget ta bási diro kammar puchar ta dikkahiper bási chibcentri ler diro lockho kontaktipha vorsnus pre e-postaadresan sprakcentrum@isof.se!

/Harriet Kowalski, kotoriphessefi gla nacionalipha haripars chib ta svedijot nisanichib ta Elina Majakari, kotasefi gla chibcentri pre Isof