Nevipe lill 2 chibcentri
Telall 2022 nasht Isof etablinela nacionalipha chibcentri gla lallarróska, byskrorisk, meänkieli ta romani chib ta akate an nevipe lillet nast diro drabba bási mengets glansiggrepat. Telall marsio ta aprilio kammar rigar pre te tobescaha padelkupar ta tobeschar búttar nevoa ninnamengare to voroa chibbcentri.
Padelkubarnas kettanessuttning
Dova 31 marsio sako lesjtsta divus gla te nominiriba to padelkupar ta vorsnos kammar ledd bútt nominirinela gla dolle najek chiben. Tjattjo akana megra vorsnos ninna biriphe gla ta nasta bescha kettanes padelkubarna ta vorsnos dikhelar pre te asha phirni ninna dole ashter patragi.
Padelkubarnas rolja glan chibcentri etablinelan ovelar te parda Isofs meng ninna te keribe oppre bukjakeripen ta dela vorsnus dumo tagodi an kava meng. Karna chibcentrin sukar kammar etablinelats ketanebeskedipa padelkubarna komaj starto voltar ko basjt
Drabba búttar bási padelkbarnas janephar ta sar nominiriberna kammar jatt to pre vosnos webbpatrin isof.se/sprakcentrumstyrgrupper.
Vorsnos rodelar bùttar nevoa ninnamengare
Tjattjo akana tobeschar vorsnos butikeribaskoro ingarari ta chib barakerari to chibcentrin. Lesjtsta korodibningdatum gla dolle najek chiben honkar:
- Meänkieli i Övertorneå – lesjsta korodibningdivus sako dova 4/4
- Lallarróska – lesjsta korodibningdivus sako dova 10/4
- Byskrorisk – lesjsta korodibningdivus 20/4
- Romani chib – lesjsta korodibningdivus 20/4
- Meänkieli i Kiruna – lesjsta korodibningdivus 22/4
Dolle nacionalipha chibcentrin avar te parela jeck nevo kotoriphe pre Isof ninna rigaripe koro nacionalipha haripans chib ta kultúra. Dojgla rodelar vorsnos thaj búttar ninnamengare to dova parela hem tjirophatrade bukakeningar telall etablinelanfazen, maskar vavoret chibaraklorna an meänkieli ta chibaraklorna an romani chib.
Diro lattjar sass aktulipha ta avande dinster pre vosnos webbpatrin isof.se/jobbapasprakcentrum hem kotar Isofs LinkedIn-patrin ta vavra kanalir.
Gosti an Övertorneå ta Kiruna
Chibcentri gla meänkieli nashta etablinelats an Övertorneå ta Kiruna telall 2022. An Övertorneå oviber kava an baramenge ninna Övertorneå komúna ta saipe librikheret gla meänkieli pre Nordkalottens kultúra- ta ródkeribascentri. Chibcentris butikeribaskoro ingarari ta jeck chib barakerari chiphas an Övertorneå akno panda dy chib barakerari avar te kamma Kiruna savo baza.
Dova 5-6 aprilio gostiade Isof Övertorneå gla te kettanes ninna reprezentanti fann komúnan, manisjusidrabbahispan ta saipe librikheret jura pre thannarna ta planirela gla mengarthanner niga saipe librikheret ta chibcentri. Glabiddran honkar te chibcentri avar te asha thanret ashter niljasken ta te thanarna steddra phinia keda. Isof trissade thaj thanaloa khedipar ta Svedoa kangarian.
Dova 4-5 majio gostir Isof Kiruna gla te avgojba chibcentri baramengat ninna Kiruna komúna ta pajkojakorot. Kettanes ninna pajkojakorot kammar Isof ledd an opprecitni te glandab nisani gla te nasta parda dolle nacionalph haripatschibens angledsajpe.
Diros dikkahibe honkar baroa
Vorsnos oppredeisiber kava baroa bukarela ta intreresi savo asjas angla asjadent attjer nacionalph chibcentri ta kammar preal jekgodi ta baromenget ledd ninna vorsnus baroa ta gindar ta idejar to kava odora planerimenget. Avela nevipe lilla var te publicirinelas an majio.
Pre vosnos chibcentri webb isof.se/sprakcentrum nast diro drabba bási mengets glansiggrepat ta bási diro kammar puchar ta dikkahiper bási vorot meng ninna asjadent attjer chibcentri ler diro lockho kotaktipha vorsnus kotar e- posta adresan sprakcentrum@isof.se!
/Ann Heimer,
projektingariphar gla chibcentrimenget pre Isof