Nevipelill 1 chibcentri

I januario an basjt preagrade Isof planeri menget angla jeck chibcentri, ninna resinet te butare attjer dole nast nasta asjades telal 2022.

Ninna dumo attjer najek kompetencijar andre bastalon ta vakeriphe fann jekgodin ingass menget glaneske. Pre vosnos chibcentri webb nast diro du drabbra bási mengets glansiggrepa: isof.se/sprakcentrum External link..

Butare jekgodi kammar rekklits

An februario masek kammar Isof rekklit butare najek jekgodi andre de najek chiben – kotas jekgodi ninna organiphar savo representanti dolle nacionalipha hariperna, kotas phravda jekgodi gla sass savo rakra ire honkar interesirimo attjer chiben. Sakhodinot kammar vorsnos prealanglat enja jekgodi ta trissat 125 dsenor. Kava kammar thaj asjat saiper gla dova savo mangela te kotar jikk webb formulari hastring gindar ta pherepa.

Niga jekgodin kammar vorsnos maskar vavoret diskusijat menget tjujal bukjakeriperna ta sar nacionalipha hariper nast debes saipet te pheripe preal paldelkubar gla saste te jikk attjer chibcentrin. Djalogo kammar thaj rekks tjujal paldelkubarna kettanesuttning ta dochál.

Nominirib to paldelkubar

An marsio masek nast diro savo privatikano dseno ire dova organiphan diro sajda parel nominirib kandidatir to dova paldelkupa savo nashta karelas gla svacko ulavdo chibcentri. Diro nast nominirib dsenor savo diro pattjar nast torescha dsanip to menget ninna chibcentri, abbo kava honkar barot te dsenon an puchan jan bási ta kiskoprinjar nominriben. Drabb buttar bási paldelkubar ta sar paldelkubar jarr to pre vorsnos webb patrin isof.se/sprakcentrumstyrgrupper External link..

Paldelkubarnas rolja anglat chibcentri kerelande ovelar te parda Isofs meng ninna te keribe oppre bukjakeripen ta dela vorsnos dumo ta godi an kava menget. Karna chibcentrin sukar kammar preagrade ketanebeskedipa padelkubarna komaj star voltar ko basjt.

Bukjakeripes skiripe

Nacionalipha chibcentri nast dela dumo ta dsanip savo hilpre gla chibikerelar an saroa themmet te rekkrade, le to pallas ta angledsaj siros chib – sav te dole nacionalipha haripatschiben nast jidra odore an Svedijo. Niga jekgodin kammar bukjakeripes solsibe diskusijar ta kava kammar asjats saipet te vasdepha fernisaresin ta hasting ninna dsanipe savo roddra dole ulavdo chibens pakjalapa ta zori.

Resultatit attjer vakeriphe tjujal bukjakeripen aver te pacha to telipt gla jeck angleske bukjakerpes skiripe attjer dole najek chibcentrin. Dova avande rigaripha gla saste ta jikk attjer dole aver senslo te pardas oppre ta diskusijar an paldelkuparna telall amoron.

Dinresker nast bjúddras vri

Ninna vrivoltasnukta an dova bukjakeripe savo nashta kerelas niga chibcentrin kammar Isof agrat planirela gla dseniphe to bukjakerperna. Telall amoron avar buttar dinresker te bjúddras vri ta spreddras pre vorsnos webb patrin isof.se/sprakcentrum External link. hem kotar nevipelillet, Isofs LinkedIn-patrin ta vavra kanalir. Dikka vri ashter avande dinresker ta spred lockho maskar interesirimo!

Djalogo basa thannar

Chibcentri avar te asjades gla lallaror an Uppsala, gla byskror an Stockholm, gla meänkieli an Kiruna ta Övertorneå hem gla romar an Stockholm. Tjattjo nii angla djalogo ninna komúnar ta bastalor bási saja than barofakken pre dolle najek thannar. Vorsnos avar te parmissa buttar bási dole an avande nevipeslill.

Diros gindar honkar baroa

Vorsnos oppredeisiber kava baroa bukarela ta intresi savo asjas anangla jikk nacionalpha chibcentri ta kammar prel jekgodin ta khediphed gindar fúsat ninna vorsnus gindar ta idejar to kava odora planerimenget. Avela nevipelill aver an phatet attjer marsio. Bási diro kammar frékkror ta gindar bási vorot meng ninna asjadent attjer chibcentri ler diro lockho kontaktipha vorsnus kotar e-postaadresan sprakcentrum@isof.se!

/Ann Heimer,
projekti ingariphar gla chibcentri menget pre Isof