Soj odova čhibjakoro revitaliziribe?

O Nacionalikano čhibjakorocentri aktivno ka barakerel thaj stimulirinel kaj te šaj te koristinen pe buteder o nacionalikane minoritetikane čhibja ko društvo (sarinipe), te del dumo džanibaja bašo disave buča, te arakhel metodija kaj te zorakeren pe sakone dženeskere šajipa te koristinel pe thaj te lel pe palal i čhib thaj te buvljarel džaniba bašo revitaliziribe.

I buti kori so barakerela pe jek čhib kaj te šaj oj te ovel dživdi ko avutnipe - bašo odova vakerela pe revitaliziribe. Keda vakerela pe bašo nacionalikane minoritetikane čhibjengoro revitaliziribe, tegani othe vakerela pe bašo lejbe palal o čhibja thaj keribe olencar buti te šaj ola te džan angle kerindor sajavera (razna) svesna merke. O butevremeskoro cili tano te keren pe merke ki te šaj te koristinen (isthemalkeren) pe buteder o čhibja sar individualikane adžahar hem ko društvo ko baro, a isto adžahar te barakerel pe jek funkcikano mukhibe ponodori o nacionalikane minoritetengere čhibja thaj kultura e javer generacijake.

Soske šaj jek čhib te reskirinel te našavdžovel?

O soskipe bašo odova sar jek minoritetikani čhib ovela ko opasnost thaj reskirinela te našavdžovel - ovela but vare palo jek bare vremeskoro aktivno asimiliribe kova so kerdža te ovel jek baro čhibmenibaskoro (paruvibaskoro) procesi. E lafeja čhibmenibaskoro procesi mangela te phenel pe kaj e čhibjakere vakeraria kotar jek čhib lokhe po lokhe mukhena pli čhib thaj lena te vakeren jek javer čhib. Ko jek čhibmenibaskoro procesi i čhib koristinela pe sa pohari ko sajavera situacie, a odova kerela i čhib te našti te ingarel pe ponodori kotar o daja-dada ko čhave.

Merke kolencar šaj phagela pe thaj iranela pe e čhibjakoro menibaskoro procesi

Jekhe čhibjakere menibaskere procese isi ole plo fundamenti ko pherdo sajavera historikane thaj društvena faktorija thaj ola retko zavisinena (umlana) kotar e individuakoro aktivno čhibjakoro biribe. Čhibjakoro revitaliziribe značinela maškar o javera buča te keren pe halatija thaj metodija te šaj te oven buteder džene so ka vakeren i čhib, te den dumo bašo čhibjakoro mukhibe ponodori maškar o generacie thaj te vazdel pe e čhibjakoro status. Jek važno kotor ko revitaliziribaskoro procesi tano te del pe dumo okolenge so vakerena i čhib te oven sigurina te koristinen i čhib ko sajavera situacije.

Preduslovija bašo revializiribe o nacionalikane minoritetikane

O Nacionalikane minoritetikane čhibja isi olen sajavera preduslovija bašo čhibjakoro revitaliziribe thaj sajavera potrebe keda vakerela pe bašo merke. E akanutne situacijakoro procenibe , mangel te phenel pe ko savo nivo tani jek čhib ko čhibmenibaskoro procesi thaj save faktorija uticinena bašo čhibjakoro koristibe, odova trebela te vel sar fundamenti bašo revitaliziribaskere merke hem javera buča. Ko jekvakti (istovremeno) o fundamentalikano izazov tano sajek sa e nacionalikane minoritetikane čhibjenge, mangela te phenel pe i fakta kaj o čhibmenibaskoro procesi kerdža akale čhibjengoro ponodorikano dživdipe tano ugrozimo.